"वळण...."

तो मला भेटला त्या वळणावर
जिथे मला मी सावरताना..

केले त्याने मजला त्याचे
ओढ मनाची आवरताना..

तेच वळण तो रस्ता जेथे
धरती आकाशाला भेटे..

इन्द्रधनूवर स्वार होऊनी
वर्षाराणी गर्जत येते..

त्या वळणावर त्याचा-माझा
अबोल अवचित परिचय झाला..

ओळख नव्हती तरीही त्याचा
स्वर माझ्या ह्रदयाला भिडला..

स्वरात त्याच्या गुन्तवूनी मज
क्षणात मग तो मागे वळला..

ओढ लावूनी अंतरीची मज
माझ्या अश्रुतून ओघळला..

त्या सरलेल्या क्षणाबरोबर
अश्रुसुद्धा निसटून गेले..

दूर त्याच त्या वळणावरुनी
आठव होऊन परतून आले..

होऊन वारा पुन्हा पुन्हा तो
असाच मजला स्पर्शून जातो..

त्या वळणावर अस्तित्वाचा
थेंब होऊनी बरसत येतो..!!!!!!