'' पहिल्या पावसात भिजताना...''

जलधारांचे तुषार झेलित
सुगंधासवे सजताना..
मृदा पांघरे हिरवा शालू
पहिल्या पावसात भिजताना...

ग्रीष्म ऋतूचा दाह सोसूनी
रणरण उन्हात शिजताना..
कणकण वेचे सुखद शहारा
पहिल्या पावसात भिजताना...

बीज तृणातील इवले नाजूक
थेंब शोषूनी रुजताना..
अंकुर बदले रोप होऊनी
पहिल्या पावसात भिजताना...

चिमणपाखरे भिरभिरणारी
किलबिलचिव कुजबुजताना..
थवा विखुरला दहा दिशांना
पहिल्या पावसात भिजताना...

गतवर्षीचा पहिला पाऊस
मनात अलगद निजताना..
आठवणींना फुले पिसारा
पहिल्या पावसात भिजताना... !!!