''हल्ली ...''

हल्ली तुझं माझ्याशी
पूर्वीसारखं पटत नाही..
खोल मनात दाटून येतं
पण.. शब्द ओठी फुटत नाही..

भेट होते स्तब्ध मुकी
भाव मात्र उमटत नाही..
तुझ्या गप्प राहण्यामागचं
कोडं काही सुटत नाही..

निसटलेल्या क्षणांमधलं
वादळ पुन्हा उठत नाही..
आठवणींची झुळुकसुद्धा
श्वासामध्ये भेटत नाही..

पुन्हा पुन्हा पारायणं
तरी पापणी मिटत नाही..
सरलं सारं.. कळतय तरी
वाट पाहून विटत नाही..

तुझं नक्षत्रांचं देणं
काही केल्या फिटत नाही..
निदान या जन्मीतरी..
फिटेल असं वाटत नाही...!!