शहाणा विचार..

नको गुंतुस गं वेडे..
जीव लावून जीवाला..
सार्‍या आशा- आकांक्षांचा..
स्वैर सोडून हवाला..

भावभावनांचे धागे..
तुझ्या आर्जवांच्या मागे..
गेले विणत विणत..
मुक्या मायेचा जिव्हाळा..

जिथं आभाळंही थिटे..
असे शब्द शब्द खोटे..
सांग कशाला जपावा..
अशा नात्याचा उमाळा ..

तुझ्या आसवांचे मोल..
ज्याला कळलेच नाही..
अशा पाषाण हृदयी..
केला अभिषेक ओला..

हुरहुर कुणासाठी..
ज्याला झुरण्याचा शाप..
अगतिक जाणीवांचा..
जिथे उहापोह झाला..

एक शहाणा विचार..
कर आता तरी वेडे..
व्यवहार भावनांचा..
कुणी स्वार्थासाठी केला..

आता विसर विसर..
झाले गेले सारे जुने..
उणे नव्हतेच काही..
असा देऊन हवाला..!!