तुझ्याचसाठी....

ओढ अनामिक आत्म्यामधली... तुझ्याचसाठी..
स्तब्ध स्पन्दने हृदयामधली .... तुझ्याचसाठी..

अधीर नयने जागृत रात्री.... तुझ्याचसाठी..
कातर कम्पित हुर हुर गात्री.... तुझ्याचसाठी..

प्राजक्ताचा बहर अन्गणी... तुझ्याचसाठी..
मालकन्स - मल्हार रागिणी .... तुझ्याचसाठी..

अवखळ वारा.. अल्लड गाणी... तुझ्याचसाठी..
मोरपिसारा .. प्रीत दिवाणी.... तुझ्याचसाठी..

सहवासाची सूक्ष्म विनन्ती... तुझ्याचसाठी..
थकले पाऊल तरी भ्रमन्ती.... तुझ्याचसाठी..!!!!